រដូវវស្សាក៏បានឈានចូលមកដល់ ហើយនេះគឺជាពេលវេលាសំខាន់ណាស់ក្នុងការថែទាំរថយន្តរបស់អ្នកសម្រាប់ស្ថានភាពផ្លូវក្នុងរដូវភ្លៀងធ្លាក់នេះ។ នៅពេលភ្លៀងធ្លាក់ខ្លាំង និងផ្លូវជន់លិច វាអាចបង្កគ្រោះថ្នាក់ដល់អ្នក និងយានយន្តរបស់អ្នក។ ដូច្នេះ នៅក្នុងអត្ថបទនេះ យើងខ្ញុំនឹងផ្តល់នូវគន្លឹះល្អៗក្នុងការថែរក្សារថយន្តរបស់អ្នកក្នុងរដូវភ្លៀងនៅកម្ពុជា។ ដោយធ្វើតាមការណែនាំទាំងនេះ អ្នកនឹងអាចរក្សាសុវត្ថិភាព និងការពារការរថយន្តរបស់អ្នក។
ពិនិត្យសំបកកង់របស់អ្នកឱ្យបានទៀងទាត់
ការថែរក្សាសំបកកង់ឱ្យបានល្អិតល្អន់គឺមានសារៈសំខាន់ក្នុងរដូវវស្សានេះ។ ពិនិត្យសំពាធសំបកកង់ឱ្យបានទៀងទាត់ និងត្រឹមត្រូវ។ ត្រូវមើលសភាពរបស់សំបកកង់រថយន្តថាមានស្នាមរហែក ឬស្នាមសឺកដល់កម្រិតណា។ សំបកកង់ដែលសឹកខ្លាំងអាចបង្កើនហានិភ័យនៃគ្រោះថ្នាក់រអឹល ជាពិសេសនៅលើផ្លូវដែលសើម។ សូមពិចារណាលើការផ្លាស់ប្ដូរសំបកកង់របស់អ្នក ប្រសិនបើពួកវាមានសភាពលើសពីដែនកំណត់ដែលបានណែនាំ។
ពិនិត្យ និងសម្អាតចង្កៀងរថយន្តរបស់អ្នក
ចង្កៀងពិតជាមានសារៈសំខាន់ណាស់នៅពេលបើកបរក្នុងស្ថានភាពភ្លៀង។ លោកអ្នកត្រូវប្រាកដថាចង្កៀងមុខរបស់រថយន្តអ្នកស្អាត ភ្លឺនិងដំណើរការតាមប្រក្រតី។ សូមសម្អាតភាពកខ្វក់ កំទេចកំទី ឬសំណើមចេញពីកញ្ចក់ ដើម្បីធានាបាននូវការមើលឃើញអោយបានច្បាស់នៅលើផ្លូវ។ ភ្លើងអ័ព្ទអាចធ្វើអោយការមើលឃើញរបស់អ្នកប្រសើរឡើងក្នុងអំឡុងពេលមានភ្លៀងធ្លាក់ខ្លាំង ឬពេលចុះអ័ព្ទ។ ដូច្នេះ សូមកុំភ្លេចតេស្តភ្លើងអ័ព្ទរបស់អ្នក ដើម្បីធានាថាពួកវាដំណើរការបានត្រឹមត្រូវផងដែរ។ ប្រសិនបើភ្លើងនេះមិនដំណើរការ លោកអ្នកត្រូវផ្លាស់ប្ដូរវាឱ្យបានឆាប់រហ័សតាមដែលអាចធ្វើទៅបាន។
ពិនិត្យមើលផ្លិតទឹករបស់អ្នក
ផ្លិតទឹករបស់រថយន្តគឺចាំបាច់ណាស់សម្រាប់មើលទិដ្ឋភាពផ្លូវក្នុងពេលមានភ្លៀងធ្លាក់។ សូមពិនិត្យមើលសភាពផ្លិតថាវាមានសញ្ញាខូចខាត ឬទេ។ ប្រសិនបើវាមិនអាចសម្អាតកញ្ចក់ឱ្យបានស្អាតទេនោះ គឺលោកអ្នកត្រូវដល់ពេលផ្លាស់ប្ដូវវាហើយ។
លាងសម្អាតរថយន្តរបស់អ្នកជាប្រចាំ
ក្នុងរដូវវស្សានេះ រថយន្តរបស់អ្នកប្រាកដជាប្រឈមនឹងភាពកខ្វក់ ភក់ និងកំទេចកំទីផ្សេងៗជាច្រើន។ ការលាងរថយន្តជាប្រចាំនឹងជួយការពារពីការកើនឡើងនៃសារធាតុច្រេះដែលអាចបំផ្លាញគ្រឿងបន្លាស់ និងពណ៌រថយន្តរបស់អ្នក។ លើសពីនេះ ការប៉ូលារថយន្តក៏ផ្ដល់ជាស្រទាប់ការពារប្រឆាំងនឹងបញ្ហាទាំងនេះដែរ។
ឥឡូវនេះ Liberty Carz ក៏ផ្តល់ជូននូវប្រូម៉ូសិនពិសេសសម្រាប់រដូវភ្លៀងធ្លាក់សម្រាប់អតិថិជនគ្រប់រូបដែលកក់ឡានបានជោគជ័យតាមរយៈ Liberty Carz App របស់យើងផងដែរ។ អតិថិជននឹងទទួលបានប័ណ្ណលាងរថយន្តឥតគិតថ្លៃភ្លាមៗ ដបទឹកដ៏ស្រស់ស្អាត មួកការពារកម្តៅថ្ងៃ និងសៀវភៅកត់ត្រាដ៏ប្រណីតមួយភ្លាមៗ។ គ្មានការកំណត់លើចំនួនការកក់ ឬអតិថិជន និងមិនគិតថ្លៃបន្ថែមឡើយ!
បន្ថយល្បឿន និងបង្កើនគន្លាត
លោកអ្នកត្រូវប្រុងប្រយ័ត្នជាខ្លាំងនៅពេលបើកបរកំឡុងពេលភ្លៀង។ សូមបន្ថយល្បឿនរបស់អ្នក ហើយបង្កើនគន្លាតរវាងអ្នក និងរថយន្តនៅពីមុខអ្នកដោយប្រុងប្រយ័ត្នបំផុត។ ការធ្វើបែបនេះនឹងផ្តល់នូវពេលវេលាគ្រប់គ្រាន់សម្រាប់អ្នក ដើម្បីការពារគ្រោះថ្នាក់ផ្សេងៗ។ ដូចគ្នានោះដែរ ប្រសិនជាអ្នកកាច់ចង្កូតបត់ ឬជាហ្វ្រាំងភ្លាមៗ និងការបង្កើនល្បឿនលឿន នោះលោកអ្នកនឹងអាចបាត់បង់ការគ្រប់គ្រងលើផ្លូវសើមរអឹលនេះ។
សូមប្រុងប្រយ័ត្នចំពោះតំបន់ទឹកលិច
នៅរដូវវស្សា វាមិនមែនជារឿងចម្លែកទេដែលលោកអ្នកត្រូវជួបប្រទះនូវផ្លូវលិចទឹក អ្នកត្រូវអនុវត្តការប្រុងប្រយ័ត្នខ្លាំងនៅពេលចូលទៅជិតតំបន់នេះ។ ប្រសិនបើតំបន់ទាំងនោះមានកម្រិតទឹកខ្ពស់ពេក វាជាការល្អបំផុតប្រសិនបើអ្នកស្វែងរកផ្លូវវាង ដើម្បីជៀសវាងការខូចខាតដែលអាចកើតមានចំពោះយានយន្តរបស់អ្នក។ ទោះយ៉ាងណាក៏ដោយ សូមកុំបញ្ឈប់រថយន្តរបស់អ្នក នៅពេលអ្នកកំពុងបើកបរក្នុងតំបន់លិចទឹកនេះ។ នេះនឺងអាចបណ្តាលឱ្យម៉ាស៊ីនរថយន្តរបស់អ្នករលត់នៅពេលទឹកចូល។
ដូច្នេះ ការថែរក្សារថយន្តរបស់អ្នកក្នុងរដូវវស្សាក្នុងប្រទេសកម្ពុជា គឺមានសារៈសំខាន់សម្រាប់សុវត្ថិភាពរបស់អ្នក និងយានយន្តរបស់អ្នក។ ដោយការធ្វើតាមគន្លឹះដែលបានរៀបរាប់នៅក្នុងអត្ថបទនេះ លោកអ្នកអាចធានាថារថយន្តរបស់អ្នកនៅតែស្ថិតក្នុងស្ថានភាពល្អបំផុត ទោះបីជាមានលក្ខខណ្ឌអាកាសធាតុដ៏លំបាកយ៉ាងណាក៏ដោយ។ សូមកុំភ្លេចពិនិត្យមើលសំបកកង់ និងភ្លើងរថយន្តរបស់អ្នកឱ្យបានទៀងទាត់ ការពារផ្នែកខាងក្រៅ និងខាងក្នុងរថយន្តរបស់អ្នក ហើយបើកបរដោយសុវត្ថិភាពជានិច្ច។
